٣١/٣ى هەموو ساڵێک ڕۆژى پەروەردەى ژینگەییە لە باشورى کوردستان

لەم ڕۆژەدا و بۆ گرنگیدان بە پەروەردەى ژینگە و ژینگەپارێزى، لەسەرجەم ناوەندەکانى خوێندنى سەربەوەزارەتى پەروەردەى(حکومى و نا حکومى)، (باخچەى منداڵان – قوتابخانەکان/ خوێندنگاکان – پەیمانگاکان) هەڵمەتى نەمام چاندن و پاک و خاوێنى بەڕێوەدەچێت.

ڕێکخراوى سروشتى کوردستان وەک ڕێکخراوێکى تایبەتمەند بە بوارى پەروەردەى ژینگەیى لە باشورى کوردستان، پاڵپشتى لە دیاریکردنى ئەم ڕۆژە و بەرزڕاگرتنى دەکات لە ڕێگەى ئەنجامدانى ئەو چالاکییانەى لەلایەن وەزارەتى پەروەردەوە دیاریکراوە، هاوکات پێشنیارى فراوانکردنى چالاکییەکان دەکات لەم ڕۆژە و لە ڕۆژانى دواتر لە ڕێگەى:
– ئەنجامدانى سیمینارى بەردەوامى ژینگەیى.
– نمایشکردنى فلیم و ئەنیمەیشنى ژینگەیى.
– گێرانەوەى چیرۆکى ژینگەیى.
– مۆسیقا و گۆرانى ژینگەیى.
– شانۆى ژینگەیى.
– کردنەوەى پێشانگاى وێنەکێشانى ژینگەیى.
– خوێندنى وانە لەناو سروشت.
– ڕاهێنانى ژینگەیى و هەر ڕێگەیەکى تر کە ئاستى پەروەردەى ژینگەیى قوتابیان بەرەو پێشەوە ببات.

ڕێکخراوى سروشتى کوردستان ماوەى زیاتر لە (۵)ساڵە، لەژێر دروشمى: (ژینگەیەکى سەوز و تەندروست لە پەروەردەیەکى دروستەوە سەرچاوە دەگرێت)، کار لەسەر بەپڕۆگرامکردنى بابەتى ژینگە بۆ منداڵانى باخچە و قوتابیانى(پۆلى یەک و دوو و سێ و چوار). ئامانجییەتى ژینگە لەناوەندەکانى خوێندن بکات بەپرۆگرامێکى سەربەخۆ.

ڕێکخراوى سروشتى کوردستان – ناوەند میدیا
٣٠/٣/٢٠٢۴